Bruticus @ TFE-16



戰鬥派合體戰士-布斯達

它應該是G1第1季狂派的最後一位合體金剛了,說起來它的誕生都幾好笑。話說星星叫偷咗老麥幾舊能源方塊就打算自立門戶,去度一個荒島上就好好笑地見到5件飛機戰車,款款唔同而且只得一只,仲保存完好(呢一點都夠晒荒謬了),於是就自己為其進行改造,製造了戰鬥派。初時都覺星星叫好厲害咁都識整,但原來在頭幾集佢自己已經講咗在斯比頓星時,佢同天火其實系科學家黎.....-_-b。呢件無頭無腦不受控制的布斯達狂亂一輪後,又屈膝於麥加登的武力之下,健康快樂地成長。後又成日與保衛者對抽,從未獲勝.....-_-b

近日與朋友閒聊變形金剛,都不約而同地覺得狂派其實唔系衰人黎,佢地只系一心黎地球揾能量帶回太空重建斯比頓星,間唔中發下一統宇宙大夢,一直以黎都只系開採下能源,無做任何壞事,連人都無殺過的~。但博派班人就下下阻頭阻勢,總是在麥sir回收能源準備走人時出現,次次都打爆晒狂派辛苦獲來的能源,重重復復這樣無聊的戰爭,系都唔俾狂派番鄉下而已。咁諗諗下,博派先系衰人黎的~~

睇番戰鬥派~日系插畫中真系個個都十足戰鬥格,個個蒙面十分好抽的。合體後更系大大只英名神武,但又點估到佢系無腦的~




TFE的包裝系對我最具殺傷力的武器,好卡食好靚下。特別系那錯漏百出的背面圖。細個時覺得好靚靚的,又多機械人,又多顏色,我仲買過砌圖添。依家睇番呢D圖其實幾搞笑的,小D邏輯都睇唔明嘎~哈哈~




仲附齊6張人布卡,數值弱到無法子講~



玩具本身嘛.......因為布斯達已經以唔同形式復刻過好多次,改色改模都有,G1、G2、TF2000和RID都出過玩具,件模又修補不足已經容容爛爛,加之TFE的用膠一向好屎,特別在TFE12大力士之後,D膠都系爛到唔使恨,TFE16、17再創高峰,去到接近老番膠質的水平,而且QC低劣,膠變形、刻畫模糊、水口超大等問題十分嚴重,絕對系我玩咁多玩具中QC最差的款(沒有之一)。但畢竟這是布斯達第一次以原色復刻,追不起G1合金版則只能求其次了。本品以RID模具復刻,配件各處有些部份和G1不同,全膠制無合金。

其他就無咩好介紹了,反正都系老角色老玩具了,可動性保持經典的[除手部上下活動外其不可動],咁仲有咩好講?睇圖罷了。

Onslaught安史羅,戰鬥派的首領,變成長長的長長的.....唔知咩車




Swindle 史云度,我細個時玩過一只絕頂樣衰的老番,系麥包咁色的~




Brawl 轟天雷,細時我有一只老番,質量絕對好過依家呢款~




Blast Off 火爆,其他同上....




Vortex 维迪斯,呢架直升機仔系幾款中我最喜歡的一架~




合照下梗要的。


各款武器還可以裝上機具模式上,很重火力,名副其實戰鬥派。


安史羅仲有塊甲板配搭可以變成一個簡單的基地。


合體!系那仲久違了的[插住個頭]的合體方式,手腳可以互換,但還是這樣比較好看吧。身形在一眾合體金剛中算是勻稱好睇的,背部亦無咩異物突出,除咗頭大外都OK靚仔的。話說玩上手才發現那個頭根本做細1/3都完全無問題的,現在真系有點頭大無腦~~~




可動性又系抬下只手咁~


因為用左RID模,所以D槍仔加晒卡榫同插孔,可以合埋一齊,安史羅塊甲板當作盾牌使用亦可。


同星星叫“媽媽”合照一張~~~




後記:除咗馬上入盒收埋之外,無其他更好的選擇了~

以後我一向唔會點收TFE,之前亦只系買左柯柏文同麥加登,此後雖然無買其他但亦對合體金剛有所期待。TFE的做功每況愈下,但即便如此,佢再出合體金剛我都諗我依然會買。細細個根本玩唔起,偶然玩下同學的或玩下老番都已經開心,目前當系買個盒又好,當系買個回憶也好,趁還有些小熱情,繼續吧~

Write a comment

Comments: 2
  • #1

    ASA (Sunday, 17 July 2011 07:19)

    買過一隻國產,合體無問題,變交通工具都無野,變人就出事,安史羅隻手吾郁得,因為無左肩關節位,穿梭機同直昇機隻手一件過,無左腕關節,不過質量同個價成正比,粗粗地玩著先

  • #2

    Rachel (Sunday, 12 February 2012 01:51)

    布斯達製造之前,前几集已經出左喇,過几集先講星星叫自己整,其實係BUG